வெளிநாட்டுக்கு ஏற்றுமதியாகும் வெண்பாகற்காய்

கம்பம் பள்ளத்தாக்குப் பகுதியிலிருந்து வெளிநாட்டிற்கு அதிகளவில் வெண்பாகற்காய்கள் ஏற்றுமதி செய்யப்பட்டு வருகின்றன.​ தேனி மாவட்டம் கம்பம்,​​ கூடலூர்,​​ சுருளிப்பட்டி,​​ காமயகவுண்டன்பட்டி,​​ அணைப்பட்டி,​​ ராயப்பன்பட்டி,​​ ஆனைமலையன்பட்டி,​​ பூசாரிகவுண்டன்பட்டி,​​ ஓடைப்பட்டி உள்ளிட்ட பகுதிகளில் விவசாயிகள் முன்பு திராட்சை விவசாயம் செய்து வந்தனர்.​ தற்போது,​​ திராட்சை விவசாயம் ஓய்ந்துள்ளதால்,​​ திராட்சை விவசாயத்திற்குப் ​ பயன்படுத்தப்பட்ட பந்தல் வீணாகாத வகையில்,​​ அதே பந்தலில் வெண் பாகற்காய்,​​ பச்சை பாகற்காய்,​​ புடலை,​​ மற்றும் கோவைக்காய் போன்ற கொடிகளை படரவிட்டு விவசாயம் செய்து வருகின்றனர்.​ இங்கு விளைவிக்கப்படும் புடலை உள்ளூர் சந்தைகளிலும்,​​ கோவைக்காய் மற்றும் ​ பச்சை பாகற்காய் கேரளம் போன்ற வெளி மாநிலத்திற்கும் வெண்பாகற்காய் சவூதி அரேபியா,​​ துபை போன்ற வெளிநாடுகளுக்கும் அதிகளவு ஏற்றுமதி செய்யப்படுகிறது.​ இப்பகுதியில் விளைவிக்கப்படும் வெண் பாகற்காயை,​​ மொத்த வியாபாரிகள் நேரடியாக விவசாயிகளின் விளை நிலத்திற்கே வந்து கொள்முதல் செய்து,​​ 10 கிலோ அடங்கிய பெட்டிகளில் பேக்கிங் செய்து,​​ நேரடியாக கொச்சி,​​ திருவனந்தபுரம் ​ கொண்டு செல்கின்றனர்.​ பின்னர்,​​ அங்கிருந்து விமானம் மூலமும்,​​ கப்பல் மூலமாகவும் துபை,​​ சவூதி அரேபியா போன்ற வெளிநாடுகளுக்கு வெண் பாகற்காய் ஏற்றுமதி செய்யப்பட்டு வருகிறது.​ இங்கு விளைவிக்கப்படும் வெண்பாகற்காய் மருத்துவக் குணம் நிறைந்துள்ளதாகவும்,​​ சத்து நிறைந்ததாகவும் உள்ளதால் வெளிநாடுகளில் இவற்றை விரும்பி உண்ணுகின்றனர்.​ ஆகவே இப்பகுதி விவசாயிகள் போதுமான லாபம் கிடைப்பதால் வெண் பாகற்காய் விவசாயத்தில் அதிகளவில் ஆர்வம் காட்டி வருகின்றனர்.​ ஆரம்பநிலையில்,​​ பாகற்காய்க் கொடியைப் படரவிட்டால்,​​ 50 நாள்களிலிருந்து 5 மாதங்கள் வரை வாரம் இருமுறை காய்ப் பறிப்பு இருந்து கொண்டே இருக்கும்.​ ​ தற்பொழுது பாகற்காய் கிலோ ரூ.​ 8 முதல் ரூ.10 வரை விவசாயிகளின் விளை நிலங்களிலேயே நேரடியாக விற்பனை செய்யப்பட்டு வருகின்றன.​ விவசாயிகள் முழு ஆர்வத்துடன் பாகற்காய் விவசாயத்தில் ஈடுபட்டு வருகின்றனர்.​ இதுபற்றி அணைப்பட்டியைச் சேர்ந்த முத்து,​​ அண்ணாத்துரை கூறும்போது:​ கடந்த 20 ஆண்டுகளாக திராட்சை விவசாயத்தில் ஈடுபட்டு வந்தோம்.​ 20 ஆண்டுகளுக்குப் பிறகு திராட்சை விவசாயம் ஓய்ந்துவிடும்.​ அதன்பின்பு திராட்சைக்காக அமைக்கப்பட்ட பந்தல்கள் அப்புறப்படுத்த முடியாத ​ சூழ்நிலையில்,​​ கொடிகளின் மூலம் பலன் தரும் பாவை,​​ கோவை,​​ புடலை போன்ற விவசாயத்தில் இப்பகுதியில் விவசாயிகள் ஈடுபட்டு வருகிறோம்.​ இங்கு விளைவிக்கும் வெண் மற்றும் பச்சை பாகற்காய் அதிகளவு வெளிநாட்டிற்கு ஏற்றுமதி செய்யப்படுகிறது.​ ​ இதில் போதுமான லாபம் கிடைக்கிறது என்றனர்.​ பாகற்காய் ஏற்றுமதி செய்யும் அனீஸ் கூறியதாவது:​ ​ அரேபிய நாடுகளுக்கு பாகற்காய் அதிகளவு தேவைப்படுகிறது.​ கம்பம் பள்ளத்தாக்கு ​ வெண் பாகற்காய்க்கு கிராக்கி இருப்பதால்,​​ வாரம்தோறும் விவசாயிகளிடமிருந்து அதிகளவு வாங்கி ஏற்றுமதி செய்து வருவதாகத் தெரிவித்தார்.
Admin

கருத்துரையிடுக

வேளாண்மை தகவல் ஊடகத்தின் செய்திகள்.. உங்கள் கருத்துக்களை சொல்லுங்கள்...

புதியது பழையவை

Recent in Sports